Os permisos de Kanka están divididos en varios conceptos: permisos de rol e permisos de entidade. Por defecto, cada campaña ven cos roles Administración, Público, e Xogante. A Administración pode ver e facer todo na campaña. O rol de Público é usado se a campaña é pública para as persoas que non son parte dela, e por defecto non ten permisos. Por último, o rol de Xogante tampouco vén con permisos por defecto, e é usado para calquera integrante da campaña. Ao invitar a unha nova persoa á túa campaña, defines o rol co cal se une. Podes crear máis roles e mover persoas entre eles, así como ter persoas en varios roles á vez.

Un rol pode ser configurado de varias maneiras. Podes, por exemplo, permitir a integrantes dun rol ver e crear personaxes, pero non editalas nin eliminalas. Se unha persoa pode crear unha entidade pero non pode modificala, recibirán permisos de edición automaticamente.

Se non queres que as integrantes dun rol vexan todas as personaxes, podes configurar os permisos individualmente en cada personaxe, xa sexa editándoas individualmente ou usando o botón de edición en masa visíbel para a Administración na lista de personaxes. Os mesmos conceptos aplícanse para todos os tipos de entidade.

Para revisar os permisos dunha persoa, vai á páxina de integrantes da túa campaña e fai clic no botón de "Ver como". Este botón só está dispoñíbel para a Administración da campaña, e só pode ser usado en persoas que non forman parte da Administración. Ao crear ou editar unha entidade usando esta función, a información será gardada no rexistro de cambios da entidade.

A maioría de entidades teñen unha opción de "privacidade" que sobrescribirá todos os demais permisos. Ao activala, só a administración da campaña poderá ver a entidade.